Verksamningur undirritaður og vinna hafin

Verktakafyrirtækið Búkki ehf. hefur hafist handa við járnabindingu vegskála Bolungarvíkurganga. Í verkinu felst járnabinding 140 metra langs vegskála í Hnífsdal auk 130 metra langs vegskála í Bolungarvík. Verksamningur við fyrirtækið var undirritaður í morgun og er vinna eins og áður sagði þegar hafin.

Samningur við Ósafl um vegskála Bolungarvíkurganga

Um miðjan mars síðastliðinn gerðu Vestfirskir verktakar og Ósafl með sér samning um smíði vegskála Bolungarvíkurganga. Um er að ræða 140 metra langan vegskála við gangnamunnann í Hnífsdal og 130 metra langan vegskála við munnann í Bolungarvík. Smíði vegskálans í Hnífsdal er komin vel af stað og eru menn langt komnir með að steypa sökkla undir vegskálann í Hnífsdal. Áætluð verklok eru í október næstkomandi. Yfirumsjón með verkinu á vettvangi hefur Garðar Sigurgeirsson.

Vestfirskir verktakar lægstir við opnun tilboða

Tilboð í "Viðhald og endurbætur á Túngötu 13 - 15 Suðureyri" sem er í eigu Fasteigna Ísafjarðar voru opnuð klukkan tvö í dag. Alls bárust þrjú tilboð í verkið. Geirnaglinn ehf. bauð 24.796.700 kr.-, Spýtan ehf. 23.623.605 kr.- Vestfirskir verktakar ehf. 22.987.000 kr. en kostnaðaráætlun hljóðaði upp á 27.439.000 kr.-

Múrskeiðin er til margra hluta brúkleg...

Gólfið í Orkubúinu var steypt á síðasta vetrardag, en eins og áður hefur komið fram er verið að endurnýja neðri hæð húss Orkubúsins sem stendur við Stakkanes. Gólfflöturinn er rétt tæpir 200 fermetrar og fóru 42 rúmmetrar af steypu í gólfið.

Starfsmenn Vestfirskra létu sitt ekki eftir liggja til að verkið gæti unnist bæði fljótt og vel. Meiri hamagangur var þó í sumum en öðrum og vildi ekki betur til en svo að Nonni Láka flýtti sér fullmikið en Jobbi kom honum til bjargar og skóf á honum afturendann með múrskeiðinni.