Brúargólfið í Mjóafirði steypt í dag

Vinna hófst í bítið í morgun við að steypa brúargólfið í Mjóafirði. 30 starfsmenn Vestfirskra verktaka og 6 starfsmenn KNH eru við steypuvinnuna sem er umfangsmikil þar sem keyra á 160 rúmmetrum af steypu í 20 hjólbörum í 160 metra langt brúargólfið og verða menn á vöktum við að keyra steypunni í gólfið. Að sögn Sveins Inga yfirbrúarsmiðs eru veðurskilyrði til verksins alveg prýðileg og í upphafi verks er ekkert sem bendir til annars en að allt muni ganga að óskum. Áætlað er að verkinu ljúki í fyrramálið.

Þurfa að keyra steypunni í hjólbörum á brúna

Framkvæmdum miðar ágætlega við nýja brú í Mjóafirði. Unnið er að sandblæstri og járnabinding er hafin. Steypuframkvæmdir hefjast upp úr miðjum mánuði en framkvæmdin verður fremur erfið því keyra þarf steypunni í hjólbörum á brúna. Unnið verður á tólf tíma vöktum og u.þ.b. tólf menn með einar hjólbörur hver. Ástæðan fyrir því að nota þarf hjólbörur er að brúin þolir ekki þung vinnutæki líkt og steypubíl. Brúin er mjög sérstök og erfitt að koma að krönum við hana. Framkvæmdirnar eru komnar á ágætan skrið og verða komnar á fullt í þessari viku.

Tekið af bb.is

Vverk Open

Fyrsta golfmót sumarsins var haldið á föstudaginn var. Spilaðar voru 9 holur á æfingavellinum í Tungudal. Sigurður Fannar Grétarsson bar sigur úr bítum þrátt fyrir að vera með tvær bjórkippur í forgjöf og hlaut stórglæsilegan bikar í boði Wurth að launum. Það sýndi sig í þessu móti að starfsmenn fyrirtækisins spanna mikla breidd hvað varðar færni í að sveifla golfkylfu, hitta boltann og halda honum inni á "greeninu". En Siggi Fann tók að sér að kenna algjörum nýgræðingum fyrstu tökin við mikinn fögnuð áhorfenda.

Nú er rétti tíminn til framkvæmda

Í morgunn undirrituðu Vestfirskir verktakar og Fasteignir Ísafjarðarbæjar verksamning um viðhald og endurbætur á Túngötu 13 - 15 á Suðureyri sem er í eigu FÍ. Vestfirskir voru lægstir við opnun tilboða þann 12. maí s.l. og hljóðaði tilboðið uppá 22.987.000 kr.- eða tæp 84% af kostnaðaráætlun.

Fasteignir Ísafjarðarbæjar eiga lof skilið fyrir að vera óhræddir við að láta slag standa og ráðast í framkvæmdir á þessum síðustu og verstu, enda má með sanni segja að nú sé í raun rétti tíminn til framkvæmda þar sem virðisauki af vinnu fæst nú að fullu endurgreiddur hjá skattinum í stað 60% áður.