Sveitarstjórnarfundur nr. 1381 í sveitarstjórn Strandabyggðar
-aukafundur

Fundur nr. 1381 í sveitarstjórn Strandabyggðar sem er aukafundur, var haldinn þriðjudaginn 30. september 2025 kl. 17:30 í Hnyðju, Höfðagötu 3, 510 Hólmavík. Eftirtaldir sveitarstjórnarfulltrúar sátu fundinn: Þorgeir Pálsson, Júlíana Ágústsdóttir, Matthías Sævar Lýðsson, Hlíf Hrólfsdóttir og Marta Sigvaldadóttir varamaður. Salbjörg Engilbertsdóttir ritaði fundargerð. Fundurinn var jafnframt tekinn upp í hljóðskrá.

Fundardagskrá er svohljóðandi:

1. Aðalskipulag Strandabyggðar
2. Deiliskipulag Kvíslatunguvirkjunar
3. Ráðning tómstundafulltrúa
4. Ráðning forstöðumanns íþróttamiðstöðvar- og tjaldsvæðis

Oddviti býður fundargesti velkomna og spyr hvort að athugasemdir séu við fundarboðun. Engin athugasemd gerð.

Þá var gengið til umræðu.

1. Aðalskipulag Strandabyggðar
Oddviti rakti tildrög máls og lagði fram eftirfarandi bókun, unna af skipulagsfulltrúa, Hlyn Torfa Torfasyni:

„Aðalskipulag Strandabyggðar 2024-2036 – heildarendurskoðun gildandi aðalskipulags
Lagt er fyrir að nýju Aðalskipulag Strandabyggðar 2024-2036 til afgreiðslu skv. 1. mgr. 31. gr. skipulagslaga nr. 123/2010. Tillagan var áður samþykkt í sveitarstjórn 13. maí 2025 að lokinni auglýsingu og send Skipulagsstofnun til staðfestingar. Skipulagsstofnun afgreiddi erindið 5. ágúst 2025 og kom þá á framfæri ábendingum um ýmis atriði sem þurfti að bregðast við áður en stofnunin staðfesti aðalskipulagið.

Í samræmi við afgreiðslu Skipulagsstofnunar frá 5. ágúst 2025 hefur verið skerpt á nokkrum viðfangsefnum í Aðalskipulagi Strandabyggðar 2024-2036, skipulagsákvæði gerð skýrari og og framsetning gagna uppfærð. Lagfæringar snéru m.a. að ákvæðum um íbúðarbyggð, landnotkun og skógrækt á landbúnaðarsvæðum m.t.t. flokkunar landbúnaðarlands, stefnumörkun um óbyggð víðerni og köflum um verndun minja og náttúru auk umhverfismats aðalskipulagsins. Stafræn gögn voru einnig yfirfarin skv. ábendingum Skipulagsstofnunar.

Framlagt Aðalskipulag Strandabyggðar 2024-2036 samanstendur af greinargerð, þéttbýlisuppdrætti af Hólmavík og tveimur sveitarfélagsuppdráttum. Öll gögnin eru dagsett í apríl 2025.

Með aðalskipulaginu fylgir einnig til samþykktar sveitarstjórnar, skrá yfir vegi í náttúru Íslands, í samræmi við reglugerð nr. 260/2018 um vegi í náttúru Íslands samkvæmt lögum um náttúruvernd.“

Oddviti gaf orðið laust.

Matthías Sævar Lýðsson tók til máls og vildi bera fram þakklæti til allra sem hafa unnið að vinnu við aðalskipulagið, sveitarstjórn og nefndarfólki, starfsfólki Landmótunar og skipulagsfulltrúa Hlyni Torfa Torfasyni. Fundarmenn allir taka undir með Matthíasi.

Oddviti lagði til að endurskoðað Aðalskipulag Strandabyggðar 2024-2036 ásamt skrá um vegi í náttúru Íslands yrði samþykkt og óskaði samþykkis fundarmanna með handauppréttingu. Samþykkt samhljóða.

2. Deiliskipulag Kvíslatunguvirkjunar

Oddviti rakti tildrög máls og lagði fram eftirfarandi bókun, unna af skipulagsfulltrúa, Hlyni Torfa Torfasyni:

„Deiliskipulag Kvíslatunguvirkjunar
Lagt er fyrir að nýju Deiliskipulag Kvíslatunguvirkjunar til afgreiðslu skv. 3. mgr. 41. gr. skipulagslaga nr. 123/2010.

Deiliskipulag Kvíslatunguvirkjunar byggir á stefnu Aðalskipulags Strandabyggðar 2024-2036 og er tekið fyrir að nýju samhliða endanlegri samþykkt aðalskipulagsins sbr. 2. mgr. 41. gr. skipulagslaga.

Deiliskipulagið var áður tekið fyrir og samþykkt í sveitarstjórn 10. júní 2025 að lokinni auglýsingu tillögunnar, sbr. samþykkt umhverfis- og skipulagsnefndar 28. maí 2025.

Gögn deiliskipulagsins sem hér er til afgreiðslu eru óbreytt frá fyrri afgreiðslu málsins 10. júní 2025.“.

Oddviti gefur orðið laust. Enginn tekur til máls.

Oddviti leggur til að Deiliskipulag Kvíslatunguvirkjunar verði samþykkt í samræmi við 3. mgr. 41. gr. skipulagslaga nr. 123/2010.

Samþykkt samhljóða.

3. Ráðning tómstundafulltrúa

Oddviti rakti stöðu máls. Til stóð að ganga frá ráðningu í starf tómstundafulltrúa samkvæmt auglýsingu en umsóknir voru dregnar til baka og núverandi tómstundafulltrúi hefur sagt starfi sínu lausu. Lagt er til að ákvörðun um ráðningu í starf tómstundafulltrúa verði frestað og sveitarstjóra og skrifstofustjóra falið að meta næstu skref.

Oddviti gaf orðið laust og Matthías Sævar Lýðsson tók til máls og telur þessa tillögu skynsamlega.

Samþykkt samhljóða.

Þess skal þó gætt að engin brestur verið á starfsemi félagsmiðstöðvarinnar Ozon og er því einnig lagt til, að sveitarstjóri og skrifstofustjóri gangi frá samkomulag við starfsmann félagsmiðstöðvarinnar um að taka að sér umsjón með starfsemi hennar, með aukinni ábyrgð og viðveru.

Oddviti gaf orðið laust. Matthías Sævar Lýðsson tók til máls

Samþykkt samhljóða.

4. Ráðning forstöðumanns íþróttamiðstöðvar- og tjaldsvæðis

Oddviti lagði til að sveitarstjórn staðfesti ráðningu Helgu Rutar Halldórsdóttur í starfið og að skrifstofustjóra og sveitarstjóra verði falið að ganga frá samningi þar um og að svara öðrum umsækjendum.

Oddviti gaf orðið laust. Enginn tók til máls.

Samþykkt samhljóða.

Fundargerð lesin yfir og fundi slitið kl:17:53