Leita á síðunni:

 

Vestfirskir verktakar ehf. stofnaðir

- 31/10/2003
Eiríkur, Garðar, Sveinn Ingi og Hermann handsala samninginn
Eiríkur, Garðar, Sveinn Ingi og Hermann handsala samninginn
Stofnað hefur verið nýtt byggingafyrirtæki á Ísafirði, Vestfirskir verktakar ehf., þar sem rennur saman starfsemi þriggja fyrirtækja. Þá mun starfsemi Eiríks og Einars Vals hf. flytjast til Hafnarfjarðar. Stofnendur hins nýja fyrirtækis eru Sveinn Ingi Guðbjörnsson sem starfað hefur hjá Eiríki og Einari Val hf., Garðar Sigurgeirsson sem rekið hefur GS trésmíði í Súðavík og Hermann Þorsteinsson sem rekið hefur fyrirtækið Múrkraft á Ísafirði.

Stjórnarformaður hins nýja fyrirtækis er Sveinn Ingi Guðbjörnsson og framkvæmdastjóri Garðar Sigurgeirsson. Hið nýja fyrirtæki hefur fest kaup á verkstæðishúsi Eiríks og Einars Vals hf. á Skeiði þar sem höfuðstöðvar hins nýja fyrirtækis verða.

Að sögn Sveins Inga Guðbjörnssonar mun fyrirtækið taka yfir starfsemi Múrkrafts og GS trésmíði og auk þess það tekur einnig við þeim verkefnum og þjónustu sem Eiríkur og Einar Valur hf. hafa haft með höndum hér um slóðir. „Okkar ætlun er byggja upp alhliða verktakafyrirtæki í byggingastarfsemi hér um slóðir og við erum mjög bjartsýnir“ sagði Sveinn Ingi. Starfsmenn fyrirtækisins verða 10 talsins í fyrstu.

(Tekið af bb.is)